സമ്പൂർണ വായനശാല പഞ്ചായത്തായി എരമം കുറ്റൂരും

(Last Updated On: October 31, 2023)

എരമം കുറ്റൂർ പഞ്ചായത്തിലെ പീപ്പിൾസ് മിഷന്റെ പ്രവർത്തനങ്ങളുടെ ഭാഗമായി വായനശാലകൾ ഇല്ലാതിരുന്ന വാർഡുകളിൽ വായനശാലകൾ ആരംഭിക്കാൻ സാധിച്ചു. അതുവഴി പഞ്ചായത്തിലെ പതിനേഴ് വാർഡുകളിലും   വായനശാലകളായി. നിലവിൽ 17 വാർഡുകളിലായി 24 വായനശാലകളെന്നതിലേക്കെത്തിയിരിക്കുന്നു. വിപുലവും ജനകീയവുമായ പുസ്തകശേഖരണ പരിപാടികളാണ് ഇതിന്റെ ഭാഗമായി പഞ്ചായത്തിൽ നടന്നത്. വായനശാലകൾക്കായി കുടുംബശ്രീയുടെ നേതൃത്വത്തിലും സാംസ്ക്കാരികസംഘടനകളുടെ മുൻകൈയ്യിലും പുസ്തക ശേഖരണം നടത്തുകയുണ്ടായി. സമ്പൂർണ വായനശാല പ്രഖ്യാപനം മാതമംഗലത്ത് നടന്ന ചടങ്ങിൽ ചിത്രകാരനും കേരള ലളിതകലാ അക്കാദമി വൈസ് ചെയർമാനുമായ എബിൻ എൻ ജോസഫ് നിർവഹിച്ചു. പഞ്ചായത്ത് പ്രസിഡന്റ് ടി ആർ രാമചന്ദ്രൻ അധ്യക്ഷം വഹിച്ചു. പഞ്ചായത് വൈസ് പ്രസിഡന്റ് ഷൈനി ബിജേഷ്,  സ്ഥിരം സമിതി അധ്യക്ഷരായ ടി കെ രാജൻ സരിത കെ,  ലൈബ്രറി കൌൺസിൽ ഭാരവാഹിയാളായ കെ വി സുരേഷ്ബാബു,  ചന്ദ്രശേഖരൻ മാസ്റ്റർ,  ടി എൻ പി കൃഷ്ണൻ,   സി ഡി എസ് ചെയർപേഴ്‌സണായ ആലീസ് ജോയി എന്നിവർ സംസാരിച്ചു. ചടങ്ങിന് പഞ്ചായത്ത് ആരോഗ്യ–വിദ്യാഭ്യാസസ്ഥിരം സമിതി അധ്യക്ഷനായ എം കെ കരുണാകരൻ മാസ്റ്റർ സ്വാഗതവും പഞ്ചായത്ത് സെക്രട്ടറി എ കെ വേണുഗോപാലൻ നന്ദിയും പറഞ്ഞു